05 desember 2007

Myndir frá jólafundinum

Ég var að setja inn myndir frá jólafundinum okkar sem var á Löngumýri í gærkveldi.
Við sátum þar tíu konur og áttum notalega stund, með jólateið hennar Jóhönnu, ávaxtasalta, piparkökur og fleira góðgæti. Jólapakkaskiptin fóru fram með hefðbundum hætti og Helga Haralds fékk verðalaunin, sem var nytjahlutir til notkunar við bútasauminn.
Nú tökum við því rólega fram yfir áramótin, þá hittumst við allar 10. janúar, hressar og endurnærðar eftir hátíðina.
Ekkert sérstakt á döfinni nema ræmuhappdrætti - sjá dagskrá.

04 desember 2007

Munið jólafundinn í kvöld

Kæru Búskur!

Munið eftir jólafundinum í kvöld, koma með litla gjöf með sér og eitthvað að sýna, anna sjáum við um.

Helga, Ebba, Anna Sigga og Jóhanna.

29 nóvember 2007

Ekkert til spillis - gæsir

Þetta er ferlega sniðugt þegar maður er að sauma gæsir, ekkert fer til spillis. Smellið á fyrirsögnina til að fá frekari upplýsingar.

Jólakötturinn


Skemmtileg blokk, jólakötturinn. Smelltu á fyrirsögnina til að ná þér í sniðið af mjása.

Jólafundurinn

Jæja þá fer að líða að jólafundinum okkar Búsknanna sem auðvitað verður haldinn á Löngumýri, næsta þriðjudag sem er 4. desember. Húsið verður opnað kl. 20:00.

Við aðalhöfðingjarnir, eða þannig, sjáum um te, kaffi, meðlæti og kertaljósin en þið komið með góða skapið og smá gjöf, heimagerða er nú skemmtilegast ef hægt er því það verða pakkaskipti til að auka spennuna. Og þar að auki verður happdrætti.

Um að gera að hafa meðferðis það sem þið hafið saumað að undanförnu til að sýna okkur hinum.
En umfram allt ætlum við að eiga notalega stund saman.

19 nóvember 2007

Myndir frá saumasunnudegi

Var að setja inn nokkrar myndir frá saumasunnudeginum síðasta en þar var boðið upp á námskeið í paper-piecing eða pappírs-saum.

Hvað er einn yard margir sentimetrar?

Ég fann þessa líku fínu síðu á netinu, var að vandræðast með að breyta yard í metra. Setti slóðina inn hérna til hægri, undir ÁHUGAVERT.

13 nóvember 2007

Ég fékk þennan póst frá Herdísi Kompukonu

"Kveðja til allra frá mér á næstu fundi hjá ykkur og þú mátt tilkynna það að ég verð með afslátt af bútasaumsefnum út þennan mánuð þe. nóvember. Ég set flest efnin sem ég á eftir á 40 % afslátt svo nú er um að gera og nýta sér tækifærið;-) Herdís"

12 nóvember 2007

KOMPAN

Heimasíða Herdísar í Kompunni komin inn hér til hægri undir "Bútasaumsverslanir"

Námskeið í pappírssaum - paper piecing

Námskeiðið í paper piecing hefst kl. 10:30 og stendur til 15:00 eða um það bil. Námskeiðið verður jólamiðað þ.e að hægt verði að nota bútana í eitthvað jólalegt.

Það sem þarf í þetta eru jólaefnisbútar af ýmsum stærðum og gerðum.
Gaman er að hafa efni sem hafa aðra áferð en venjuleg bútasaumsefni eins og t.d glansandi svo eitthvað sé nefnt.
Svo eru það venjuleg ar saumagræjur, ef einhverjar eiga litlar stikur sem eru sérstaklega fyrir paper piecing þá endilega að taka þær með (þær eru samt ekki nauðsynlegar)

Námskeiðið kosta kr. 2000 á konu.
Allir velkomnir, svo endilega takið með ykkur þessar konur sem hafa áhuga á bútasaum en ekki haft sig í að vera með. Ekki er nauðsynlegt að vera meðlimur í félaginu til að taka þátt í þessu námskeiði.

Hlökkum til að vera með ykkur þann 18. í jólaskapi og huggulegheitum. Ef einhverjar spurningar vakna þá endilega hafið samband.

05 nóvember 2007

Munið eftir saumasunnudeginum á Löngumýri

18. nóvember 2007 kl: 10:00 – 16:00 saumasunnudagur á Löngumýri - Jólaþema

Helga Friðbjörns og Svana ætla að vera með námskeið í Paper Piecing – og kenna okkur að búa til lítil sniðug smástykki sem tengjast jólunum. Við fáum seiðandi súpu og gullið salat í hádegisverð.
Þið þurfið að skrá ykkur hjá einhverri okkar fyrir föstudaginn 16. nóv. svo við höfum einhverja hugmynd um fjölda í mat.

30 október 2007

Tilkynning frá Þórdísi á bókasafninu á Króknum

Á bókaafnið er komið dálítið af nýjum handavinnubókum, þ.á.m. slatti af bútabókum og fleiri á leiðinni. Þær eru allar á 10 daga láni, svona til að byrja með.

Kveðja
Þórdís

23 október 2007

Kikið á myndirnar

Var að setja inn nokkrar myndir frá síðasta fundi okkar Búsknanna.
Helga

Dagskrá Búsknanna 2007-2008

18. okt. – fimmtudagur 2007 kl: 19:00 – 23:00 kvöldfundur á Löngumýri
Fyrsti fundur haustsins. Ekkert sérstakt þema þetta fyrsta kvöld en við hristum okkur saman, tökum fram tólin og hefjumst handa.
Vetrardagskráin kynnt. Svo stefnum við á að vinna áfram í teppinu góða – sem við byrjuðum á sameiginlega í fyrra. Við hellum uppá, allir taka eitthvað smálegt með sér með kaffinu.

18. nóvember 2007 kl: 10:00 – 16:00 saumasunnudagur á Löngumýri
Jólaþema - Helga Friðbjörns og Svana ætla að vera með námskeið í Paper Piecing – og kenna okkur að búa til lítil sniðug smástykki sem tengjast jólunum. Við fáum seiðandi súpu og gullið salat í hádegisverð. Þið þurfið að skrá ykkur hjá einhverri okkar fyrir föstudaginn 16. nóv. svo við höfum einhverja hugmynd um fjölda í mat.

4. desember 2007 þriðjudagur kl: 20:00 – 22:00 jólafundur á Löngumýri
Nú njótum við notalegrar jólastemmingar á Löngumýri. Jólagóðgæti í gogginn – kertaljós og svo sýnið þið okkur náttúrulega hvað þið ætlið að gefa tengdó í jólagjöf (svo við getum nú apað það eftir!!!) Jólagjafaskipti – Komið með litlar handgerðar gjafir, bútasaumaðar eða eitthvað annað bútasaumstengt. Gjafirnar verða númeraðar, hengdar upp til sýnis og loks dregnar út, og þá verður sko kátt í höllinni.

10. janúar 2008 fimmtudagur kl: 19.00 – 23.00 - kvöldfundur á Löngumýri.
Ræmuhappadrætti. Allar koma með 3 ræmur, sem mælast 3” – 42” (breidd efnis) hver ræma.

23. febrúar 2008 laugardagur kl. 09:00 – 16:00 ca. - reynum AFTUR
Saumalaugardagur með Bútóskonum á Blönduósi og Skagaströnd ásamt vonandi Kristrúnu í Quiltbúðinni og hennar konum. Nú þarf að skrá sig hjá einhverri okkar fyrir fimmtudag svo við höfum einhverja hugmynd um fjölda í mat.

27. mars 2008 fimmtudagur kl. 19:00 – 23:00 kvöldfundur á Löngumýri
Hér ætlum við að reyna að vera með námskeið í Crazy Quilt – nánar auglýst síðar.

21. apríl 2008 mánudagur kl. 19:00 – 23:00 kvöldfundur á Löngumýri
Einhvers konar kynning eða námskeið – nánar auglýst síðar

24. maí 2008 laugardagur - Lokafundur.
ÓVISSA - ÓVISSA - ÓVISSA

Góða skemmtun!

17 október 2007

Saumahelgi Quiltbúðarinnar 11-14 október

Ég var að setja inn myndir frá þriðju saumahelgi Quiltbúðarinnar á Löngumýri, við Jóhanna Björns sátum þar og saumuðu frá fimmtudegi til sunnudags ásamt 30 öðrum konum. Ekkert smá gaman hjá okkur.
Ebba og Anna Sigga voru saumahelgi nr 2.
Myndin er af dúk saumuðum af Mæju í Borgarnesi, Jóhönnu Maríu Jónsdóttur.

11 október 2007

Fyrsti fundur

Fyrsti fundurinn var haldinn þann 19. september. Góð mæting eða 16 félagar mættu.
Dagskrá vetrarins hefur verið send út á öll netföng sem við höfum, ef einhvern vantar dagskrá er bara að hafa samband við Jóhönnu.
Myndir frá fundinum komnar inn.

21 maí 2007

Vorfundur

Konurnar fóru að tínast inn um dyrnar á Löngumýri upp úr klukkan sjö þar sem hitað var upp fyrir aðalatriði kvöldsins, sem var kaffifundur hjá Svönu á Hótel Varmahlíð.
Þrettán konur, auk Svönu, röðuðu sér í kringum borðið og nutu kræsinga sem kitluðu bragðlaukana svo um munaði.
Dregið var í happdrætti og komu vinningar, sem voru þrjár bútasaumsbækur, í hlut Svönu og Bíbíar og Ebba fékk mætingarverðlaun vetrarins, en myndin sýnir einmitt Hlíðarfjallið hennar, verkefni í Fattarakúbb Quiltbúðarinnar.
Að sýna og segja frá er fastur þáttur á hverjum fundi og er afrakstur þessa fundar að finna undir myndahlekknum hér til hægri.

Við þökkum samstarfið í vetur, hittumst hressar og í bútasaumsstuði í haust.
Jóhanna, Anna Sigga, Solla og Helga

14 maí 2007

Flottur dúkur

Uppskrift frá Debbie Mum, smella á fyrirsögn til að fá upp snið og leiðbeiningar.

Helga

Slúttum með stæl

Jæja Búskur.
Þá fer að líða að síðasta fundi vetrarins, en hann er einmitt á mánudaginn næsta, 21. maí.
Þetta verður einfalt, ekki þarf að taka með neitt í gogginn, bara "ábyrjaða" stykkið sem þarf að setja kantinn á eða quilta smá.

Mætum allar hressar og kátar á Löngumýri um sjöleitið eins og vanalega.
Höfum með okkur eitthvað til að sýna og segja frá eða já eins og áður sagði, eitthvað til að hafa milli handanna.

Um kl. 9 sláum við þessu upp í kæruleysi örkum upp í Varmahlíð, nánar tiltekið á Hótel Varmahlíð til Svönu, setjumst þar að kaffiborði, spjöllum, grímumst, hlæjum, fíflumst, sýnum og segjum frá. Svo verður dregið í happdrættinu. Það eru "nokkrir spennandi vinningar"

Hlökkum til að sjá ykkur, Helga, Solla, Anna Sigga og Jóhanna.

17 apríl 2007

Flottur fundur, fallegt handverk

Ellefur konur mættar með góða skapið, sumar með saumavélarnar aðrar með nál og tvinna en margar höfðu með sér eitthvað til að sýna.
Eins og til dæmis þetta hrikalega flotta teppi hennar Valgerðar, alveg æðislega fallegt.



Eða allir dúkarnir hennar Önnu Pálu, ekkert smotterí sem konan er búin að sauma.





16 apríl 2007

Kvöldfundur þriðjudaginn 17 apríl kl. 19:00 - 23:00

Þá er komið að næst síðasta fundinum okkar í vetur en á morgun þriðjudaginn 17 apríl frá kl: 20:00 – 22:00 er kvöldfundur á Löngumýri.

Á dagskránni höfðum við sett upp litavalskynningu en sleppum henni að þessu sinni.
Ef einhverjar hafa verið að sauma blokkir í bjákateppið er um að gera að taka slíkt með, alltaf gaman að raða saman og skoða útkomuna, en við tökum bara upp þráðinn aftur í haust við bjálkana.

Við hellum uppá, allir taka eitthvað smálegt með sér með kaffinu.

Þetta danska listaverk fann ég á síðunni hjá Danska bútasaumsfélaginu.
Öðruvísi kantur, mjög flottur finnst mér.

Kveðja Helga

Flott munstur

Og hér er annað af sömu síðu, virkar ekki mjög flókið en fallegt.

16 mars 2007

Flott námskeið

Það rættist heldur betur úr þátttöku á námskeiðinu með Sveinu á Öngulstöðum, pentun á efni, sem við stóðum fyrir á Löngumýri í kvöld.

12 konur mættu með sínar uppáhalds myndir sem skannaðar voru inn í tölvu og prentaðar á efni sem áður höfðu verið meðhöndluð á sérstakan hátt.

Það verður sko nýr og spennandi bútasaumur sem nú tekur við.

15 mars 2007

Bútóshelgi á Löngumýri

Við Jóhanna voru við sauma á Löngumýri um síðustu helgi í boði Bútós á Blönduósi, svakalega gaman, mikið saumað og töluvert mikið hlegið, etið alveg ógurlega og potturinn notaður langt fram á nótt. Aldrei þessu vant gleymdi ég ekki myndavélinni og tók slatta af myndum.
Smellið á fyrirsögnina til að skoða þær
kveðja Helga

13 mars 2007

Námskeið fimmtudaginn 15. mars

Sælar allar

Næsti fundur hjá Búskum er fimmtudaginn 15. mars n.k.

Hann verður með óvenjulegu sniði, því Sveina Björk frá Öngulstöðum ætlar að koma og halda
námskeið í myndvinnslu mynda og prentun þeirra á efni.

Námskeiðið byrjar kl. 19 og verður til kl. 22.
Hver okkar kemur með mynd sem við viljum prufa að vinna með. Byrjum að undirbúa efnin fyrir prentun, síðan farið í myndvinnsluna og endað á að prenta.

Verð fyrir mannin er 3.500 kr. -
Lágmarksþátttaka er 8, hámark 12-14. Þess vegna er nauðsynlegt að láta skrá sig - Í SÍÐASTA LAGI Á HÁDEGI Á MIÐVIKUDAG.
Eftir námskeiðið getum við setið og spjallað yfir kaffibolla og "nammi".

Bestu kveðjur
Jóhanna, Helga B., Sólveig og Anna Sigga.

Komnar inn nýjar myndir


Þá er ég loksins búin að koma inn myndum frá saumalaugardeginum í febrúar.
Ásthildur Guðmundsdóttir frá Skagaströnd kom til okkar og saumaði með okkur en hún er í Bútós klúbbnum á Blöndósi.
Við vorum því 9 sem skemmtum okkur við saumavélarnar þann daginn.
kv Helga

12 febrúar 2007

Ferðatöskusýningin

Við verðum með Ferðatöskusýninguna á laugardaginn á Löngumýri.

08 febrúar 2007

Saumalaugardagurinn nálgast

Jæja, allar saumaglaðar konur...

Þá er að fara að setja sig í saumastellingarnar því saumadagurinn nálgast.

Eitthvað verða þær færri Bútós konurnar á Blönduósi en til stóð, ekkert við því að gera.
Kristrún í Quiltbúðinn ætlar að koma og sauma með okkur.
Hún verður ekki með "búð "með sér, en ef einhverja vantar eitthvað af efnum eða annað er bara að hafa samband við hana og hún grípur þetta með sér fyrir eitt orð.

En og aftur.... áríðandi að láta einhverja okkar vita um mætingu, því eins og áður, við þurfum að vita hvað á að elda mikið af graut.

Hittumst á Löngumýri 17. febrúar í saumastuði.
Jóhanna, Helga, Anna Sigga og Sólveig.

14 janúar 2007

Myndir frá fundinum

Það eru komnar nýjar myndir á myndasíðuna. Stefanía var sem betur fer með myndavélina sína en ég hafði gleymt minni.

Fjórtán konur voru mættar til sauma, en því miður fengum við ekki ferðatöskusýninguna, einhver mistök hjá Íslenska bútasaumsfélaginu sem sér um töskuna, en vid fáum hana í staðinn á fundinn í febrúar sem verður SAUMALAUGARDAGUR.
Þá er von á félögum úr Bútós á Blönduósi og frá Akureyri, sem ætla að koma og sauma með okkur.

Þá þurfa allir sem ætla að vera í mat að skrá sig.

Helga

09 janúar 2007

Fimmtudaginn 11. janúar

Sælar allar Búskur og gleðilegt nýtt ár með þökk fyrir það gamla.

Nú er Jóhanna búin að senda póst á allar á listanum, já og ekki bara einu sinni heldur tvisvar... gott hjá henni.
Við mætum auðvitað allar eldhressar og í saumastuði... eða hvað?
Ég var að finna saumadótið, leitaði lengi innan um allt jóladótið sem ég er að ganga frá. Eins gott að pjötlurnar fari nú ekki í sama kassann og skrautið á jólatréinu því þá finn ég það seint, eða þannig.
Við hlökkum til að sjá ykkur allar og munið að koma með litlu rauðu bútana, ja eða þá blokkina ef þið eruð búnar að vera rosa duglegar.

Jóhanna á fleiri búta ef einhver hefur ekki fengið sinn.

Sjáumst, Helga og hinar skvísurnar.