Saumahelgi 2007

Strúnubragurinn sem Gunnar á Löngumýri samdi og fór með á Quiltbúðar-saumahelgum síðasta haust.

Lag: Stebbi og Lína

Það var fyrir nokkrum árum þegar Strúna fór á stjá
að hún stefnu tók að hóa saman konum.
Sem höfðu jafnvel áratugi alið sömu þrá
með afgöngunum listhneigð sína tjá.

En hvað var þá til ráða til að koma þessu á skrið
var Kristrúnar því næsti höfuðverkur.
Svo fljótlega hún kynna fór sér kvennaathvarfið
þar sem kirkjan veitir saumaóðum grið.

Því varð Löngumýri staðurinn sem Strúnu líkar vel
svo hún stefnir þangað miklum kvennaskara.
Sem að mæta þó að stundum nauði stormur eða él
til að standa í botni túrbósaumavél.

Er þær byrja hér á fimmtudögum fílingur er sá
að formúlan sé um það bil að hefjast.
Með títuprjón í munni, tána peldanum á
á taugum þar til Strúna segir má.

Í kílómetravís þær síðan kaupa rándýr ver
til að klippa nið´r í oggulitla búta
Þær reyna svo að púsla þessu saman sikk og þver
en það sáralítill möguleiki er.

Svo stæra þær og masa hversu stórkostlegt það sé
ef þær stykkjum geta komið aftur saman.
En greinilegt er samt að mesta gleði láta í té
þegar gefur Strúna flokknum matarhlé.

En með bútasaumaveiki fylgir hvorki kvöl né sár
og þær kátar virðast una meðferðinni.
Nema á stöku hvarmi mögulega glitti í gleðitár
þegar grúppan hittist aftur næsta ár.

Tra la la
Gunnar Rögnvaldsson okt 2007

Lokafundur - sleginn af

Á dagskránni okkar er síðasti fundur settur þriðjudaginn 24. maí sem stenst engan vegin hjá okkur því 24. maí er laugardagur. Það var reyndar meiningin þegar við settum þessa dagskrá saman að fara í einhverja stutt ferð til Akureyrar þennan laugardag, kíkja til Kristrúnar í Quiltbúðinni, etv einhver smá uppákoma þar og borða svo saman á eftir. En það féll um sjálft sig því Kristrún er á ferðalagi þessa vikuna og kemur ekki heim fyrr en þennan sama laugardag.
Þá datt okkur í hug að heimsækja Bútós á Blönduósi og borða saman á Pottinum og Pönnunni þó stuttur fyrirvari væri á þeirri hugdettu hefði það átt að geta gengið upp.

En eftir nokkrar vangaveltur var ákveðið að fresta þessu fram á haustið því Jóhanna er komin með flensu, Anna Sigga í önnum og ég (Helga) er upptekin á laugardaginn.
Jóhanna mun því senda tölvupóst um það, á allar sem hafa netfang. (svona inn á milli hnerranna)

Við ætlum að koma saman og skipuleggja starfið, athuga með Löngumýri og fleira þann 26. ágúst svo fyrsti saumafundur ætti að vera fyrstu eða aðra vikuna í september. Þá munum við kynna drög að dagskrá svo allar hugmyndir eru vel þegnar, og nýir félagar eru velkomir í klúbbinn.
Fyrsti kvöldfundurinn verður svo auglýstur í Sjónhorninu.

Skurðarmottuna, stikuna og strauborðið okkar, tók ég (Helga s: 863 6114) með mér heim eftir síðasta fund á Löngumýri, gufustraujárnið er hjá Ebbu (s: 895 5024) . Ef einhver Búska vill nýta sér þessa hluti í sumar er bara að hafa samband við okkur.

Við þökkum starfið í vetur en hlökkum til að byrja aftur af fullum krafti með haustinu.

Bútóshelgin

Var að setja inn myndir frá Bútóshelginni á Blönduósi helgina 2-4 maí, en þá bauð Bútós, nokkrum vildarvinum að vera með á saumahelginni þeirra. Helgina var að sjálfsögðu frábær, mikið saumað, mikið spjallað og mikið borðað. Við vorum þrjár úr Skagafirðinum, Ebba, Anna Sigga og Helga Bergs.
Mynd: óvissuverkefni frá föstudagskvöldinu.