Já, já, það var engin lognmolla á saumahelginni á Blönduósi í þetta skipti, frekar en fyrri daginn.
Allar svo glaðir og kátir með bútana sína og saumavélarnar allt um kring, já og aldrei þessu vant fengum við nóg að borða.
Skoppa og Skrýtla höfðu að sjálfsögðu farið í búrið hjá betri bændum í héraðinu og fóru svo sannarlega ekki tómhentar þaðan út. Við hinar dunduðum við að leggja á borð og í mesta lagi skera niður grænmeti annars var allt fyrirfram tilbúið. Gugga Páls er alltaf góð í pungunum, sérlega vel lagaðir hjá henni, Anna Margrét bauð okkur að smakka skyrbrauðið sitt og í fingurbjörg af þessu líka dásamlega krækiberjavíni.
Svona rétt inn á milli máltíða var skorið og saumað, straujað og stungið, rakið pínu upp, enn ekki samt mikið. Óvissuverkefni var tilsniðið og lagt upp í hendurnar á okkur, alltaf gaman að svoleiðis.
Af Búskum vorum við: Helga Har, Ebba, Anna Sigga, Stefanía og Helga Bergs.
Anna Bjarka og Ragga komu frá Akureyri og Mæja frá Borgarnesi, tvær úr Borginni þurftu að snúa við á Holtavörðuheiðinni og urðu því af gamninu.
Þetta var alveg frábærlega gaman og þakkir skulu þær fá, þær Skoppa og Skrýtla fyrir framtaksemina svo nú ekki sé minnst á þær sem bjuggu um okkur í kotum sínum.
Myndir birtast innan tíðar frá herlegheitunum á myndasíðunni okkar.
Engin ummæli:
Skrifa ummæli